OORDENKING

Vrydag 25 April
Die ellende van ons ellende

Openbaring 3:14-22

Daar heers ’n magdom ellendes. Ons ervaar dikwels die ellende van die lewe. Daar is kommer oor finansies, daar is siektes en beproewinge. Al hierdie kwellinge is maar die oorsaak van ons werklike ellende, naamlik die sonde. Honger en kommer kan erg wees, maar die sonde is veel erger. Die sonde skei ons van Jesus Christus en die ewige lewe. Die probleem is dat die meeste mense nie bewus is van hierdie ellende nie. Daarom leef hulle soos die gemeente van Laodisea wat hulle verbeel dat hulle ryk is en aan niks gebrek het nie.
Openbaring roep almal van ons op om die regte pad te volg, ons onkunde te erken en by God raad te kry oor die regte weg met kennis van ons ellende. Die enigste plek waar daar uitkoms is uit ons onkunde, is by God. Daarom is dit so noodsaaklik om die Woord van God getrou en gereeld te lees en die eredienste by te woon.
Ons is as gelowiges egter bewus van die enigste weg tot saligheid - Jesus Christus. Besef tog ons afhanklikheid van Hom en dien Hom met die hele hart.Ds. Jan Schroeder (Emeritus)

𝔊𝔢𝔩𝔬𝔬𝔣𝔰𝔟𝔬𝔫𝔡 𝔳𝔞𝔫 ℌ𝔢𝔯𝔳𝔬𝔯𝔪𝔡𝔢 𝔊𝔢𝔪𝔢𝔢𝔫𝔱𝔢𝔰 Lewensbrood 2025 - (CC BY-NC-ND)